نغم حبي
إسمع نغم حبي بإحساس إنسان
يمكن حنينك يلتقي مع حنيني
غنّيت لك يا شوق بصوت عطشان
لحن الرضا المفقود بينك وبيني
كم عاتبت عيني وكم صاح وجدان
وانتي ولا تدرين وينك وويني
عن دمعة الماضي أو لوعة الآن
يا حيرة المجروح لا تسـأليني
شوقٍ يشد القلب ويشيّد اشجان
واخفي وانا الملهوف صرخة سنيني
فتحت لك قلبي واشرعت بيبان
وناديتك بخوفي ورعشة يديني
هذي دروب الحب أو غربة احزان
احترت في نفسي وحرقة أنيني
يا ظاميه والشِعر أوزان وألوان
وبحور للعاشق وسرٍ(ن) دفيني
يا جوهره بالروح وبالفكرعنوان
من ماضي الأوقات عشقي الثميني
يا فرحة المحروم يكفّيك نسيان
قولي متى يا فرحتي تذكريني؟