قـال الـذي يقـرا بليـا مكاتـيـب =نصيحـة تبقـى لكـم مـن عماكـم
ياعيالي اللي تشرفون المراقيب= تريضوا لي وأقصروا من خطاكم
خوذوا كـلام جحيـش مابـه تكاذيـب=مثـل السنـد مظمـوم للـي وراكـم
ياعيـال انـا ليـه عليكـم مطاليـب= عطوني القرظا جـزى مـن جزاكـم
دليـت ادوج فـوق عـوج المذاريـب=وخطاي قصرت يـوم طالـت خطاكـم
يامـا توليـت القبايـل تقـل ذيــب =من خوفتي يقصـر عليكـم عشاكـم
وياما شريت السمن من عرض ماجيب =ويفـز قلبـي يـوم يبكـي حـداكـم
احفيت رجليني بحامي اللواهيب= وخليت لحم الريم يخالط غداكم
ياعيال وان صرتوا ضيوف ومعازيب =سهل النبـا ياعيـال ملحـة قراكـم
والمذهب المذهب ترى مذهب الطيب= والمذهـب الخايـب يبـور نساكـم
وترى النجاسه من كبـار العذاريـب =وهرج البلايـس مايطـول لحاكـم
دينتكم دين(ن) وابي منكـم الطيـب=ياعيال مادري هالردى منين جاكـم
ياعيال يوم(ن) عاوي(ن) دوني الذيب=بالقبر مافرق طيبكـم مـن رداكـم
ياعيال دوكم لحيتي كلها شيـب =هذا زمان قعودنـا فـي ذراكـم
خوالكم بالطيب تروي المغاليـب= ولو تتبعون الجد محد(ن) ولاكـم
وش علمكم ياتاركين المواجيب= حسبي عليكم هالردى منين جاكم
ياعيال ياعيال الخنا كلكم عيب= ياللي على الوالد كثيرا" لغاكم
قصيتكم واسندت وادي سلاحيب=ولقيت بالصبخاء مدافيق ماكم
ياعيال بعتوني بصفر العراقيب= ماهي حقيقه سود الله قراكم
اخسو خسيتو ياكبـار اللغابيـب= اهبــوا هبيتـم يقطـع الله نماكـم
يالله عسى عماركم شمسها تغيب=ويعتم قمركم ثم يظلـم سماكـم
وحريمكم ياعيال تحبل ولا تجيـب= ويمسن رماله ويتيتـم ضناكـم
العرض الشجري