قصيدة الأمير زامل للإمام عبد الله الفيصل

[سليمان الخطيب]

قصيدة الأمير زامل السليم
التي بعثها للإمام عبد الله الفيصل

سلام يا من سار لبلادي حريب=الحكم لله ثم له محد عصاه
شكيت له حالي وعيا يسجيب=ومن الغضب ردت خطوطي ما قراه
رفعت أنا الشكوى لمن هو لي يثيب=رب السما المعبود فلاق النواه
يا الله يا اللي من يسألك ما يخيب=يا من رجاه الخلق في عالي سماه
تذهب وشاة السو عنا من قريب=وتصلح حوال الناس والحاكم قداه
فيصل ملك نجد بتدبير مصيب=بالحكم يا ما به عفا وادرك مناه
مير القدر يمضي ويخطيه الطبيب=والشر ما اخطا والشرايع منتهاه
رفيقك الصاحب يحطونه حريب=ومن شب نار حطه الله في سناه
وخلاف ذا يا راكب حر نجيب=مثل الوضيحي يوم يذعر من قفاه
والا ظليم فر واقفى مستريب=قد طالع القناص يوم انه رماه
فوقه غلام مرسل عزمه صليب=سهل النبا كل المعاني لي قضاه
انشر من الفيحا لملفى لك قريب=عبد الله المذكور سهل في نباه
اقره سلام عد ما يومي العسيب=من رايح صلف تزعزع من سماه
انهض بديوانه لنا قيل غريب=خطر بعجات الصبا يدرك مناه
حر ولد حر ومن بيت عريب=ساس الندى المقرن هم اول من بناه
حكام نجد اللي مناحاهم تعيب=سلطان نجد سعود باليمنى طواه
ووالدك فيصل وانت يا سقم الحريب=يا شيخ نجد الزود حذرا لا تطاه
يا من كسب للطايله قبل المشيب=ترى بصيص العين اشوى من عماه
ترى بصيص العين دمح للصحيب=والزود من مثلك على مثلي شناه
واحذر تصافي كود من راسه صليب=حر الى ضاعن الاريا لك لقاه
والنذل ما يصلح وزير لك قريب=خله بعيد لا يغرك في هواه
الملك من بعض الوزر خطر يعيب=يغديك في رأيه الى منه رماه
احرص على جمع الرعية لا تسيب=والحضر سكان القرى لموا عصاه
اعزم وزم واجزم ترى الراي الصليب=توليف ربع بالقرى انتم مناه
ومن شار بالفرقى فخله لك حريب=واتبع لقول الرب لا تتبع سواه
ومع ذا عليك اليوم لي حق مصيب=معروف قدمته ومحتاج جزاه
من قدم المعروف يوما ما يخيب=عند الملاقى لازم ياخذ قضاه
يوم إن نجد تختبط لك بالشعيب=مع حاكم كل القبايل مع سناه
سريت في جنح الدجا قلبك مريب=وضدك بركن بلادنا يسحن دواه
حرص على حكمك ولا له به نصيب=واذراك رب البيت من سدو سداه
عطان مطلوبي وعييت استجيب=ولوني طلبت النصف من ملكه عطاه
كله لعيني من ذخرته لي صحيب=والدك فيصل يوم لبلادي نصاه
ابديت مجهودي ولفيته قريب=واليوم يا عرق الندى هذا جزاه
يا صانع البندق لعلك ما تخيب=صنع لي الجايز ومطلوبي لقاه
مخ الفرنج لعايل جانا حريب=دهم به العايل ترده عن هواه
والله ما يجلي عن الكبد اللهيب=كود الفرنجي يوم يظهر من خباه
ومصقلات معتبينه للحريب=تصرخ الى اونست اللحم علق شباه
يا ما فرقنا بالملاقى من حبيب=عن لام خل بالدجا يكثر بكاه
خلي على الساقة لحوام وذيب=والضبعة العرجا تعشى من شواه
ربعي قواطيع ومع ذا تستجيب=وان صاح صياح درعنا في بلاه
الدار له حق على الساكن صعيب=لا فرعن البيض هذا هو جزاه
العذر لاجا بالمحارم ما يطيب=ذاري نسيم الروح يرخص من غلاه
نصبر على البلوى الى جت من صحيب=بأمر من المولى على عبد قضاه
فان كان ما حاربت من جالي حريب=ما عاد تنفع من تجي له في هواه
والصدق ما يجزع لمن قلبه لبيب=واللي عمد للكذب تقصر به خطاه
دار تصافي الضد وتعادي الحريب=لعل هاك الدار ما يرعد سماه