هذي قصيدة جميلة للشاعر عبدالله بن فرج الشمري
اتمنى تنال على اعجابكم
طاحن سنوني وانقلب عارضى شيب=ودليت اقوم بموخرى قبل رأسي
خذيت من طبع النضا شــمّخ النيــب=ثوران هرش بالبروك متواســي
هذا طــــريق الحق ماعنه تجـــنيب=مضمون لو تفنى الجبال الرواسي
قالوا لي ان الشيب مابه عــذاريب=هرجن يقولونه على غير ساسي
الشيب مابه لا معزه ولا طـــــيب=الا المهونه والتعب والتعاســــــي
صعبن على راعيه بعض المواجيب=الهين اللين على العود قاســـي
عقب الوناسه والطرب والتعاجــيب=لا شك يأتيك الزمان انعكاســـي
يصير لك عقب الوناسه عواقــــيب=آخر نهار وحال دونه دماســــي
تحرم من السجة ونط المراقـــيب=وتنسى طرات البال لو منت ناسي
الشيب يتعب شمخ النيب والذيب=حتى النبات اليا كبر صار عاســي
ياشبت تجفاك البني الرعـــابيب=من عقب منت جنيه تصبح نحاسي
شي صحيح وماضين له تجاريب=ما يفيد لوتلبس جديد اللباســـــي
العود له حشمه وقدر وتوجــيب=وقت مضى واليوم كنه مداســـي
حتىمن الأقراب يلقى التعاتيب=تستضعفه بعض النفوس الخساسي
الشيب لاصادك بعكف المخاليب=مايفارقك لوصحت تبي الخلاصـــي
ميلاف لامنه لفت له مناديـــب=مايجفّله كثر البكا والحساســــــي
مير يا للة ياعالم خفى خافى الغيب=عالم خفا المخفي بقلب سياسي
عبدك دون ارضاك ماله مقاضيب=يامخضرن بالنبت عقب اليباســـي
طالبك عفوك وانت معطى المطاليب=بيومن تلين به القلوب القواســي
ليا صرت بالمظلم بشين الظنانيبب=حفرن حفر عرضى وطولي قياسي
والله يحسن لنا ولكم الخاتمه
العرض الشجري