إيه .. اسْرِفي في خافقي واسْتبيحيـه

[حمد البادي]

إيه .. اسْرِفي في خافقي واسْتبيحيـه=مدامـك الجـلاّد وانـا الضحـيّـه
لا تأخـذِك رأفـه ولا رحمـةٍ فيـه=لابـوه لابـو سِلْسْـلَـة مَجْنِـوِيّـه
يِسْتاهل اللي جـاء لْحَتْفِـه برجليـه=وانـتِ مـن آثَامِـه وذنْبِـه بريّـه
لاتتركينـه لْيـن اصَابِعْـك تِدْمِيـه=وان كان قَطّعتيـه . ماهـي ردِيّـه
والى قضيتي مـن تسلّيـك فِرْمِيـه=رمـي المتـاع السَقْـط بالمهمهيـه
ماعـاد ينفعلـي ولا نيـب باغـيـه=بعْـدِك حـرام تْعِيـش فيـه آدميـه
نقطة . ومبدأ باول السطـر . تنبيـه=عطينـي اذنـك واسمعينـي شويّـه
لـي مَطلـبٍ واحـد وبالله تِمِـيـه=آخر طلـب وآخـر رجـاء ياوفيّـه
تَدْرين ويش اقول بالرمـز واعْنِيـه=كانك علـى خبـري منـوّل ذكيّـه
يااافطر كبدي يوم اشوفـه واراعيـه=شـيٍ يذكّـرنـي بقـايـاك فِـيّـه
يَرْحم . ظَهَر جابك . وْصَدرٍ رضعتيه=راعي شعـور اللـي فِدَنّـك دْمِيّـه
إن كان شفتيني . عن العيـن وآرِيـه=ليـن اتِقَلّـع وانتحـي لـي نِحِـيّـه