يابنت ..!

[روح التميمي]

مرحبا بكم أيها الأحبة ..

عدنا بعد انقطاع

قال روح التميمي عفا الله عنه ..

يابنت وش جرّاك بالنار تومين=والنار تحرق من عليها يحومي
يابنت انا طعن الهوى حيل يوذين=ويهفي مقامي بين ربعي وقومي
يابنت أنا راعي سلوم وقوانين=أرعى سلوم الناس وأرعى سلومي
يابنت أنا لا شفت غدر المحبين=أطوي حبالي وآتشطر وأشومي
أنا حشيم من قرومٍ حشيمين=وأنتي حشيمة بنت قرم محشومي
يابنت أنا بي عزةٍ كان تدرين=ولي منزل بين القمر والنجومي
يا بنت وإن شفتين موسوم باللين=قلبي على دحر المذلة جزومي
يابنت ركّزتي على القلب رمحين=واخلفتي بفعلك صلاتي وصومي
رمح نفذ بالقلب من بين ضلعين= والرمح الآخر بالشواكل يعومي
وطاح الجمل وأرهت عليه السكاكين=ترى الجمل لا طاح يزري يقومي
يابنت من علمك بالجوف ترهين=خلي طعون الجوف لأعتى خصومي
يابنت همي منك بالقلب همّين=ومن قبلك ضلوعي ملتها همومي
يابنت أنا أبكي كانك اليوم تبكين=شوفي دموعي غاشيات هدومي
يابنت موتي قام بالعين يراعين=وبسيفه البتار يشّر ويومي
الغلطة اللي حدّرت دمعة العين=أرخت عزومي يوم شدت عزومي
راح الربيع وجاك حمو الحميمين=وما ظنتي تقوين لفح السمومي
حان الرحيل وحل بأسبابه البين=من غلطةٍ فلّت بقلبي ثلومي
ودعتك الله ياعنود المزايين=هذي علومي يوم جاتك علومي
وياقلب .. سامحني على علمي الشين=من عقب ما ني لك عطوفٍ رحومي
أدري قطعت اليوم منك الشرايين=لما غرقت بوسط ذيك الدمومي
كرامتي ياقلب ديست برجلين=ودون الكرامة بايرات سهومي
أصفيك للي للي بالهوى لك صفيّين=وأعزلك لامن شفت فعل الرخومي
انس الهوى واعزم على فراق غالين=عده كما طيفٍ لفى بالحلومي

وقبل أنسى .. ترى لو يدمج (قسم القصائد المميزة) مع قسم (المواهب الواعدة)

كان يصير أحسن .. لأن الواحد الصراحة ينحرج يحط قصيدة له بأحد

هالقسمين المميزة عالي جدا , والمواهب بعد أقل من الطموح ..

خلوه يصير ( قسم القصائد ) ويشمل المنقول وغير المنقول ,

والمميز والواعد والوسط والنبطي والفصيح


وإلا وش رايكم ؟

وبعدين وش قصة خيار التوسيط ما يشتغل !!

تقبلوا تحياتي

[YsOrI]

هلا والله بروح وين الغيبات يعني صرت مشرف هناك كبر راسك علينا الله يالدنيا !!!

القصائد المميزه للشعراء الي ماذكروا بالأقسام والمواهب للشعراء الجدد لاكن قصيده مثل قصيدك هذي هذا مكانه ياطويل العمر ,,

الف شكر ولاتقطع ترا مالنا غنات ,,

[روح التميمي]

المشاركة الأصلية كتبت بواسطة الخاطوف

هلا والله بروح وين الغيبات يعني صرت مشرف هناك كبر راسك علينا الله يالدنيا !!!
القصائد المميزه للشعراء الي ماذكروا بالأقسام والمواهب للشعراء الجدد لاكن قصيده مثل قصيدك هذي هذا مكانه ياطويل العمر ,,
الف شكر ولاتقطع ترا مالنا غنات ,,

الخاطوف بجلالته ..!

يا مرحبا يا مرحبا .. أظنك اول مرة ترد علي بحياتك

مع إني أتميلح قدامك هاك الحين .. بس ماش

عندي إنك تقول وش الذباب اللي أبلشنا

هههههههههههههههههه

تراي أمزح لا تروح بعيد ..

وبعدين أبقول لك سالفة .. أقسم بالله إني ما دخلت المنتديات

ولا تشجعت على الدخول والمشاركة إلا يوم شفت منتدى الطيار

وهو أول منتدى أسجل فيه بحياتي .. وقعدت لي شهور

أدوّر أحد يعطين وجه .. بس للأسف الشلة الماسونية سفهتني !

ورحت لمجلس عنيزة .. وتراي مغصوب على الرقابة هناك

شكرا لمرورك واحتفائك .. وتأكد إن هالمنتدى غالي علي بالحيل

ولا يمكن أنساه وأنسى ربعي فيه لو كان ما كان .. هذا منتدى أبو ناصر

حبيب قلبي .. وشلة بني ما سون من أصدقائي مهما كان ..

وشكرا كذلك على إطرائك وكلماتك الحلوة ..

تقبل تحياتي

[طارق]

ياهلا والله وغلا بروح التميمي ....

مبطين ماشفناك يازين مبطين
مدري معك نسيان ولا قطاعه ....

الف شكر على القصيده الرائعه وابشر باللي يرضيك

تحياتي

[روح التميمي]

المشاركة الأصلية كتبت بواسطة طارق

ياهلا والله وغلا بروح التميمي ....
مبطين ماشفناك يازين مبطين
مدري معك نسيان ولا قطاعه ....
الف شكر على القصيده الرائعه وابشر باللي يرضيك
تحياتي

مشكاي يا ملجاي يا علتي فيك . . تغيّر الدنيا وأنا ما أتغيّر!

لشكرا لمرورك يا طارق ..

وشكرا لكلماتك الحلوة وتشجيعك العذب

وبرضه مشكلة التوسيط ما تشتغل عندي !!

تقبل تحياتي

[عطاشا]

الرجال يسير علينا بس مساييره مهيب واجد

يمر له لغز وما حله


ياهلا بالتميمي وياهلا بأديبنا الغالي وياهلا بهالمصافحة الرائعة

بس ملاحظتي :

يابنت موتي قـام بالعيـن يراعيـن
وبسيفـه البتـار يشّـر ويـومـي

الا تشاركني الرأي بان كلمة (يراعين )تم اقحامها بالشطر بالقوة وان هناك زيادة حرف الياء الأولى

الملاحظة الثانية واعتقد انها غلطة مطبعية هي

أصفيك للي للي بالهوى لك صفيّيـن
وأعزلك لامن شفت فعـل الرخومـي

(للي) واحدة بالشطر الاول و ( لك ) بالشطر الثاني زائدتين

تحياتي

[روح التميمي]

المشاركة الأصلية كتبت بواسطة عطاشا

الرجال يسير علينا بس مساييره مهيب واجد
يمر له لغز وما حله

وش نسوّي يابن الحلال مشغولين بالحيل !

ياهلا بالتميمي وياهلا بأديبنا الغالي وياهلا بهالمصافحة الرائعة

هلا بك أكثر يا عطاشا .. المهلي ما يولي

بس ملاحظتي :

يابنت موتي قـام بالعيـن يراعيـن
وبسيفـه البتـار يشّـر ويـومـي

الا تشاركني الرأي بان كلمة (يراعين )تم اقحامها بالشطر بالقوة وان هناك زيادة حرف الياء الأولى

إلا تسيف .. وتعرف الشعر النبطي مهيب مشكلة إنك توطّى لك

كم حرف إلين يزبط البيت ..! البيت فيه ثقل لأنك تضطر

تختلس الياء اختلاس وهذا كثير بالشعر ويسمونه ثقل ..!
الملاحظة الثانية واعتقد انها غلطة مطبعية هي

أصفيك للي للي بالهوى لك صفيّيـن
وأعزلك لامن شفت فعـل الرخومـي

(للي) واحدة بالشطر الاول و ( لك ) بالشطر الثاني زائدتين

صدقت غلطة مطبعية ..

تحياتي

ياسلام عليك يا عطاشا تعجبني ملاحظاتك ..

شكرا لمرورك واحتفائك وكلماتك اللي تنومس !

وعلى فكرة ترانا لطشنا لغزك حق الورع ونشرناه

بمجلس ابن قاضي بصفحة عنيزة وذكرناك هناك

وقلنا نمون عليه .. وتراي دايم أدخل هنا وآخذ قصايد

لشعراء عنيزة , وأنشرها بمجلس شعراء عنيزة

بس إني أذكر المصدر , وأذكر حتى اسم الشخص اللي منزلها

هنا .. لأني حريص على حفظ الحقوق .. وبنفس الوقت

أبث دعاية للمنتدى بأسلوب غير مباشر .. ودايم أقول تراهم

ربعي وأمون عليهم .. شكرا لك

[يزيد]

عطاشا ناقد فني .. ومدقق إملائي خخخخخخ

تسلم يالتميمي وقصيده جيده بارك الله فيك

[روح التميمي]

المشاركة الأصلية كتبت بواسطة يزيد

عطاشا ناقد فني .. ومدقق إملائي خخخخخخ

تسلم يالتميمي وقصيده جيده بارك الله فيك

شكرا لك يا يزيد على المرور والتعليق

وعطاشا ناقد مهوب سهل يا يزيد

راعي نظر وبخص .. ويكفي دليل على ذلك

إنه يسمّين الأديب الألمعي ..! هماي أقول لك إن راعي بخص !

تقبل تحياتي

[عطاشا]

هذا اللي يحليك يالأديب الالمعي والا عيال العجز واجد

امممممممممممممممممممح هذي حبه على خشيمك