يا عيني اللي تهل ادموعها ( حكمه )

[ماجدونا]

يا عيني اللي تهل ادموعها والبال منحاس = من هجر الايام كن بموقها يقدح شرارا
البارحه يالطيف الحال ما هملجت بنعاس = كل تهنا بحلو النوم وعيوني سهارا
ادير الافكار بالدنيا واصنف كل هوجاس = سبحان من دار دالوب الفلك لين استدارا
لقيت دنيا بحرها ما يقيسه كل غطاس = يمسن الايام حيل ويصبحن فيها عشارا
انا بجيل طواريق المروه فيه دراس = كثيرهم ما يميزون الحصان من الحمارا
كلين لو عاشروا ماهيب عشرتهم على ساس = مبنا ولا يصلح المبنا على هيارا
نقَالة بالخفا لاهل القفا شطرات الامواس = حاذور عن قربهم يا جاهل فيهم حذارا
فيهم عذاريب والهيـّن مصيبهم اكبر الباس = مغلين راع الحلال ومستحقرين الفقارا
ومن لا يجنب سبيل المهلكات السبع من راس = مثل الذي عاف دينه وارتكب دين النصارا
يا حيف كيف اللحى تنبت على ناس من الناس = صورة رجاجيل ظاهرهم وباطنهم سمارا
ياما بهم من قريب الوصف من منقوش الالعاس = والعلم يا فاهمين المعرفه ما ينتبارا
طير الى شفت زوله قلت هذا طير قرناس = لاشك لاهده الصقار تفرسه الحبارا
امشكل الريش لكن مخلبه ماهوب فراس = وقت المصاليح من فيـّة جدار الى جدارا
شاريه واللي يسوق ابه الثمن يبشر بالافلاس = سبحان من خس مقداره عقب هاك الوقارا
كزيت للمربع اللي ما وطاه الجند عساس = لاجا براسه ولا جا عنه مردود الخبارا
والغي له دوحة في ظلها اهل الغي جلاس = ويهزعون الغصون اللي تميل بها الثمارا
فيما مضى واصبحت هاك الغصون الخضر يباس = لكن شاوٍ ورقهن من صروف الوقت نارا
تغطلست والزواهر من نجوم الليل طماس = من عقب ماهوب غربيب الدجا مثل النهارا
مشهور غوج الهلالي والاصيل حصان عباس = نسخن واهلهن وركبوا للطراد اهل الشهارا
والصيد جا له قوانيص وانا مانيب بلاس = عذروبهم ما يميزون البياض من الكتارا
كن الاماني مع من جا لصيد الصيد مكناس = وش فايده من بواريد تثور ابلا عيارا
والريم له فارس فيه المحابي تقل ملاس = من ركبة الوعل كوع وركبته كوع الحوارا
الى هوا خبـّة قفر كلاها مابه اوناس = مشيه على الكوع والركبه يمين والا يسارا
فالى انطوى بالمسير وجنـّه الحذرات غلاس = يتلي بعضهن بعض قرّر علمها بالخيارا
فالى انقطع سوّها يبهج ضميره عقب الاياس = والقايده من ذحاح الموت تجضر الخوارا
والمرجله بالمحاضر مثل بن هندي وعفاس = دون المحارم على السايم يبيعون العمارا
اللي الى جنهم فج المرافق مثل الاقواس = لازم لاهلهن يخلطون الكتار مع الدمارا
هذي دروب المراجل يا مدور كل نوماس = ماهوب زين الملابس بالمجالس والممارا
جيل اربع عشر غالب هله حساد وانجاس = عميان الاريا كباره ما يربون الصغارا
كل يقري عياله والقرايه ما بها باس = احد مطوعه واحد لجل المبايع والمشارا
يفرح الى من واحدهم حفظ مقدار كراس = يرجيه فيما بعد يضرب مضاريب التجارا
والعمر ساعه ويطوي تيمها ترداد الانفاس = واهل الجهل غافلين بلذة الدنيا سكارا
ذا قول من زل عمره وانتهى عن درب الادناس = فضل من الله وهذي من عطاياه الكبارا
وصلوا على المصطفى ما هل وبل وهب نسناس = اعداد ما يبس عود النبت من عقب الخضارا

[ابن جبيل]

اللهم صلي علي حبيبنا محمد وصح لسان الشاعر