متى يقول الطير عطني سبوقي،،قصيده لشاعر : احمد بن عبدالله الهندي

[عفار]

متى يقول الطير عطني سبوقي =واعطيه اناالمطلوب من دون منه

ويقفي وكنه مقفي بمعلوقي=ومحذا عيوني بالسماء يرقبنه

بارض ثراها ما وطاه مخلوقي=بس الحباري بالأثر زخرفنه

ويبقا على السواق دور اللحوقي=ونطرد نخاف ابصارنا يفقدنه

حرا على غيره بفعله يفوقي=وصفه شياهين البحر ما حونه

تشيب من وصفه جميع الطروقي=وينهي قواف القول ما وصفّنه

الله جعل فيه المزايا طبوقي=جمل تقاطيعه وهن جملنه

من حد مخلابه الى الراس فوقي=ما فيه ما ينقال ليت ولو انه

اشقر صفي اللون ما به دقوقي=صدره عريض وراقي الراس عنه

ومناخره والعين ماهيب ضوقي=وبوز لطفقات الحباري يسنه

متبكر القرناس قول وثوقي=توه بكار وما تخمنت سنه

هادي ركود وللمفاقع لحوقي=واقشر ملاويع السمك ما افختنه

ودايم وطلعه ياكد انه حقوقي=مامرة راعيه به خاب ظنه

وطلعه على اللي ريشهن به بروقي=لاقبل عليهن كوبرن وكشفنه

وصارن سوات الشمس عند الشروقي=منظر جمال الطير هن كملنه

واحدثبهن من قو ضربه فتدوقي=وطارن يبن خبت لهن يزبننه

واردم ورا اللي منتويها بعوقي=وعلم المنيه بالمخلب يكنه

وتهايفت تبي الوعر والشقوقي=وحولبها قبل الوعر ياصلنه

لحظه بها بال المولع يروقي=ينسا هموم بالضمير اتعبنه

الطير ناجح والمخاوي صدوقي=قطع الصحاري البيد ما يزملنه

رجل اديب وله مع العرف سوقي=وامور ما تعنيه ما يشغلنه

الشاعر : احمد بن عبدالله الهندي
القصيم ،،،عنــــــــيزه
15/9/1425هـ