قالوا علامك تسهر الليل كله=قلت آه ما تدرون باللي جرى لي
يا ناس مدري وش تقولون لله=احكوا على اللي من طواريه خالي
الهرج يوم إني تراي أستزله=ما بي من الهرّاج قولٍ يقالي
كلٍّ على طاروق قلبه يدله=وأنا على طاروق قلبي لحالي
يالله ياللي كل كربٍ تحله=يا عالمٍ بمغيّبات الليالي
تفرج لقلبٍ من همومٍ تتله=تلّة عزوم مجدّلات الحبالي
لو إني اكشف عن ضميري مجله=كان عذروني طيبين الرجالي
يفزع لي الطيب على عادةٍ له=فِتْخان الأيدي مِرخصة كل غالي
تلقى النشامى في نهار العِظِلّه=الله يجعل للأجاويد تالي
وإلا الردي قربه وبال وتمله=ويكفيك عن بعض الرجال المجالي
أدناة ما خيل عليه ويذله=ويمناه تقصر عن يمانٍ طوالي
عزّي لمن هو بالدهر مسندٍ له=إلى لدّت العمله ورخص الحلالي
عليك باللي لا لفوهن محله=قلّط لهم يا (ورنس) صفر الدلالي
هبّط على البن الخضر ما فطن له=لما على المحماس ركب العوالي
ما ينقد المجلس على حمسةٍ له=ولا برّزه عن حمسة البن صالي
هذي يبهّرها وهذي يزلّه=وفنجالها يشدي لدم الغزالي
واف الخصايل والوفا عادةٍ له=تثني له الجيران في كل حالي
وصلاة ربي عد وبلٍ يهله=على نبيٍّ فضّله ذا الجلالي
العرض الشجري