أزعل وترضيني

[روح التميمي]

.

أزعل وترضيني وتزعل وأراضيك=ونذوب ما بين الزعل والرضاوه
الله يديم الحب في قلب مغليك=مشاعرك يمي تزيدك غلاوه
خلك كذا صافي وأنا مثل أصافيك=ترى المشاعر تزدهر بالصفاوه
مهما تباعدني عن الشوف أراضيك=حبك يزيد بوسط قلبي ضراوه
أحب من حبك ويفرح بطاريك=وأعلن لمن يكرهك صلف العداوه
أمشي على كيفك وأراقب مساريك=وألين لك لا شفت منك القساوه
أنت الزعيم وماش غيرك يدانيك=يا مالك زين الدلع والشقاوه
بالسلهمة تذبح قلوب الصعاليك=أنا أشهد إنك فايق بالحلاوه
تكاملت روح الحلا في معانيك=ما شفت مثلك بالحضر والبداوه
الله يحفظك من اصدوف الشرابيك=يا ماخذ (فوق الشهاده علاوه)