أسد المحاورة .. تقديم وتعريف

[روح التميمي]

أسد المحاورة المرحوم
عبدالعزيز الحمد البادي
( . . . ـ 1402هـ)


كتب معدّا كتاب (شعراء عنيزة الشعبيون) في تقديمه ما يلي :


ولد بمدينة عنيزة , وتربى فيها , ثم سافر إلى الشام مع أحد أقربائه

ثم عاد إلى مسقط رأسه , ثم سافر إلى المنطقة الغربية وعمل في خفر السواحل

مدة , وانتقل بعد ذلك ليعمل في المنطقة الشرقية في رفحا وعرعر (!!)

وكان كثير الأسفار إلى الكويت مما جعله يخالط الشعراء .. وله مساجلات مع بعضهم

وأخيرا استقر به المقام في مسقط رأسه عنيزة .. ويميل إلى شعر المساجلات

وهو في هذا من الشعراء البارزين .. أما في حقل القصيد فلم نعثر له إلا على القليل

وقد توفي رحمه الله في عام 1402هـ .. ا.هـ

* * *

قال روح التميمي : وأبو حمد رحمه الله شاعر محاورة لا شاعر قصيد

أحب المحاورة حبا منقطع النظير , وظل مخلصا لها حتى آخر يوم من حياته

اشتهر بسرعة البديهة , إذ كان أسرع شعراء المحاورة قريحة , فلم يكن

يمضي وقتا طويلا في استحضار البيت لدرجة أنه لا يتيح أحيانا للصفوف بأن

يرددوا الشطر الأول بعد الثاني من بيت خصمه !

شاعر قوي مهيب الجانب .. يخشاه شعراء المحاورة ويحسبون له ألف حساب

شكل مع المرحوم حمد المغيولي ثنائيا ساحرا .. وبينهما مساجلات عديدة عذبة

مسجلة بالصوت ومدونة في الكتب والصحف .. وقد أحيت مساجلاتهما

سوق المحاورة في عنيزة , وأصبحت من المدن التي تُشد إليها رحال المعجبين بهذا الفن

لعب عبدالعزيز مع معظم شعراء المحاورة المعروفين آنذاك أمثال أبو ماجد وأحمد الناصر

وخلف بن هذال ,وشليويح المطيري , ومستور العصيمي , والشيباني وغيرهم عشرات ..

ويقال إن من روافد قوته في المحاورة أنه رحمه الله (ما له مناغيز ) فقد كان مشهودا له

بالتقى والورع .. وكثرت محاوراته في أيامه الأخيرة مع كل من حمد المغيولي وأحمد الناصر

توفي رحمه الله في حادث سيارة في (صفر 1402هـ) , وتوفي معه شاعر الزلفي المعروف

مساعد الغزي , وكان معهما في السيارة عبدالمحسن العوهلي الملقب (مطوع الشعار)

من أهل الزلفي الذي أصيب بكسور شفي منها بعد فترة رحمه الله ..وكان رحمه الله

قد قطع على نفسه عهدا بأن يحج لمساعد الغزي عاما ,ويحج العام الذي بعده لعبدالعزيز البادي ,
وأوصى أن يستمر هذا البر من أحد أبنائه .. قال :

هالعام أبا حِجّْ لمساعد=والعام الآخر لابن بادي
كاني بدنياي متساعد=هي نيتي والله الهادي
اللي توفوا وانا قاعد=في حادث صار لاعادي
أوصيت في برهم واعد=والبر عادات الاجوادي
وإن مت ما اوفيت هالواعد=يوفيه عني حدا أولادي

* * *
رحم الله عبدالعزيز البادي فقد له دور بارز في الإسهام في رفع اسم عنيزة عاليا في دنيا

الأدب من خلال شعر المحاورة .. وكان له دور بارز مع غيره من الفحول في إثراء

حلبات المنافسة وميداين المحاورة في المناسبات الرسمية وغير الرسمية في عنيزة

وهو من الشعراء الذين نشروا هذا الفن في عنيزة , فرشوا الطريق للأجيال التي جاءت

بعدهم من شعراء ومتذوقي المحاورة من الحضر والبادية .. ولعل معظم شعراء

(ديوانية عنيزة للمحاورة) المؤسسة الأدبية التي وُلدت عملاقة , وافتتحت رسميا

خلال يام عيد الفطر الفائت 1427هـ .. يدينون بالفضل لـ (عزيّز البادي)

في توجههم للمحاورة , وإعجابهم بها فنا أدبيا راقيا ..

لم أجد من شعره قصيدة سوى هذه التي وردت في كتاب ( شعراء عنيزة الشعبيون)

ولعلنا نجد غيرها عند ابنه ووارث مجده الشاعر الكبير حمد العبدالعزيز البادي

الذي سنترجم له قريبا بإذن الله ..


قال عبدالعزيز البادي :

يالله يا منشي ثقيل السحابي=طالبك يالمعبود تكتب ثوابي
يافارج الشدات جرحي سطا بي=بيَّحت سري عقب ما نيب كاميه
من اسباب توليف الغنم والتجارة=الطرشة اللي بآخرتها الخسارة
زود على سهر الدجى والعزارة=تعبت أنا والورع حفْيَت مواطيه
مشيت من جوبة عفيف وتنوّيت=عليل لا ينقال حيٍّ ولا ميت
ياليتني في طرشتي ما تهقويت=ما طحت في جرفٍ هيارٍ مبانيه
مشيت مع جوٍّ بعيد السرابي=ما حولي إلا زاميات الهضابي
من لايفات الوقت لواعذابي=قلت آه من قلبٍ تزايد طواريه
ساعة لفينا جاني الوجه الأقشر=أول سلام وبآخرتها تغيّر
دلّيت أعزي الورع وقام يتعبّر=قامت تنثّر فوق خده عباريه
قلت ارجهنّ وقال ياخوي ويلاه=من عقب شفت أمي تمنّيت فرقاه
ياليت من خلا بلاده ومبناه=يلعي بها بوم العشا في غوانيه
جيت الوكيل وقال لي كرْوتك وين=قلت والله يالممدوح ما في يدي شِين
أبيك تسلّفني لما الله يغنين=والبشت للدلال ما نيب مصخيه
قال انص بيتك ثم هات الدلالي=لا رحم أبو مالٍ قعد عقب حالي
والوقت هذا عادته بالميالي=والصبر مفتاح الفرج كان تبغيه
وصلاة ربي عد ما هل همال=أو ما تطارد من سراب أشهب اللال
أو ما تسجّ الحِيل سندا ومحوال=على نبيٍّ وضّح الله مماشيه

* * *

نماذج من محاوراته

هذه محاورة بينه وبين حمد المغيولي رحمهما الله :


حمد

ادبح الليل واللـــــي يعتزي ما لقيته = يوم شلنا عليه الشيـــل صارت عوافي
والله انـــي من اول غافـلٍ ما نويته = مير شفت الحذر بالعين والشوف كافي

عبدالعزيز

كان في منتهى الدرب الطويل احتريته = مثل قـــال قــدام الـــــركاب النصافي
يــم انــا حقــي اللـــــي وارد لي وفيته = ضابــط للعيـــار زنادهــــا والمشافي

حمد

يـــوم ابيح كنيني طاف بــــي ما قويته = عوج الايام منــــــــي بينت كل خافي
انت منـــــي عداك الــلوم حقي قضيته = ليت الايام تافــي مع سرى كل وافي

عبدالعزيز

ودي انك تخل العلـــم حيـــه ومـيـتــــه = لبّ لي وافتهم ما اقول لك يالسنافي
وانت تفتح لنا المعنى وانا ما اشتهيته = كل شــي تعدى عن طـــــراته يعافي

حمد

والله اني فلا اسلك مع طريق جفيته = شرت والشور منكم لي قرار ومطافي
افتح الدرب وانته فاهم مــــا غويته = وان تعافيت انا مثلك تــــــراي متعافي

عبدالعزيز

واهني من بروحـــــي يا حميد فديته = بارد في سموم القيـــــظ وشتاه دافي
تجذبه صدفــة الايام لــو مـــا رميته = كودي اخذ معه سجات والستر ضافي

حمد

تبكــي العين من فـــرقا حبيب بكيته = لا تبكي عيونـــي تزعج الدمع صافي
وين ذاك الخضار اللـي خليٍ رعيته = تقطفون النـوايــــــع قبل حل القطافي

عبدالعزيز

وانت فـي خرمسي الليل ترقا بهيته = مـــا تكلفت مثلــــــي بالحتيفه وحافي
واتمنى ولكن مــا حصل مــا هقيته = تقضب ايدي على اللي ممتحني كتافي

حمد

انت ترجي وانا اللي في رجا الله رجيته = ما لفانا من اللي شطر البيت لافي
ما حصل لي من الله يا عزيز رضيته = وانت جرتك ما طمّت عليها السوافي

عبدالعزيز

منكرٍ يــا عقيد المعركه مـــا مشيته = مــــا يخبرك بالسيرات مثل الصحافي
انت تكتب وانا اللــي تكتبونه محيته = خابرٍ وش ورا الميته وبرجي واخافي

حمد

شلهبن الليالــــي قلعن طنـــب بيته = مـــا بقى الا العذوق وفات وقت الخرافي
انت قاري وانا اللي ترسمونه قريته = صرّمت عشبة الريضان شهب الهيافي


* * *


وهذه محاورة مع خلف بن هذال العتيبي :-

البادي:

يـــا ســلام الله ســـلام بـــــردة مثنيه == عد مـا ينشا الخيال ويرزم الرعادي
ردة تطرب سموع اهل القلوب الحيه == له حلاوة ذوق بالمحدار والمسنادي

خلف:

مرحبا ترحيبة منــي من احسن نيه == حشمة للحاضرين وحشمة بن بــادي
انت تفهم للطروق وخطتــك ممشيه == مثــل ما سويتها قـــــلل بملح الزادي

البادي:

الله اكبر يا خلف هذال وش هالجيه == ما دري صدفه عليك او رابـط ميعادي
عام الاول قصوا الجره مع المريه == مير عجات الهوى تخفى الاثر بالوادي

خلف:

الليالـــــي تجمع شتات العرب بشويه == جيت رفت لها عينــي وعرق فوادي
كان قصاص الــدروب محضر مركيه == الجرر واجـــد ولا تبكي ذهيب غادي

البادي:

العلـــوم كثار والغالب مــع الشرعيه == انت بزنادك وانا ابشعم بقـدح زنادي
قالـــوا انك عام الاول رحــــت للبريه == انت وش جابك لجنة عاد بن شدادي

خلف:

ما كذبت ان الحسانـــي يذهبن السيه == شب نارك واتتقد ويجـــي مية وقادي
انت حالم ما صدق حلمك جمعت بليه == ما درينا عن علوم قال عنها الرادي

البادي:

يـــا حليلك يالعلــــوم بخطــــة برحيه == كان هو شرف شهر شعبان عقب جمادي
يا جمل ما دري وراه تحوشك الدوريه == وانت عن درب الحلال مجنب من غادي

خلف :

الشهور الها عدد وايامها مخفيــــــه == كـــم تفيد وكــــم تصيد وحبلها منقادي
الجمل يسحب خطامه مـا وراه دعيه == ما حذف زهبة شداده فالمحيط الهادي

البادي:

الشريب اللي شريبه فوق جال الطيه == مـــــا دري وشبه ترقب جية المدادي
والزمـــاليق الضحى بالقايله مرعيه == لا صبــاح ولا هجــاد يقعـد الـــرقادي

خلف:

يحسب انـــه كاسب لـــه خزنـــة منسيه == مــــا درى مفـــلــس وتتلــــــه الابعادي
كان يا شمس الضحى وقتي طويل الفيه == ما بقي للناس ظل وضاع شوف العادي

البادي:

انت لـــو زليت عنــــدي زلتك مرفيه == لا تذكــــــرت الجهام وقصة المجلادي
والله انــــي ما رغبت الصبغة البنيه == خابـــــر غيب الليالـــــي فخها صيادي

خلف:

لا تذكــــرني زمان سطـــوته بيديه == صار فيها المسك والعنبر وعود الكادي
الجهل ينعم مع الشايب ولـه ماريه == كـــــم حدا من ليلة سودا وقدمه حادي

البادي:

يوم سبلا والجهام وركضة الرجليه == وانت ذاك الحيـــــــن لا دله ولا برادي
كل راعــي غـــي لو تنهاه يتبع غيه == مثل شن الريح في جسر على بغدادي

خلف:

ما كذبت انا قــــرينك والسنين رخيه == يـــوم سبلا وانت لا راحل ولا شدادي
لو مسكتك في زمان فات ذقت الكيه == بس فينا طبيعة مـــــا نروع الاجوادي

البادي :

خلها بكتابها يـــا صاحبــي مطويه == فزعة اجدادك وهذي من عزوم اجدادي
يوم وقت ثليــم وانت تروح للصينيه == كاسب عز وكرامــــه ما عقبت بلادي

خلف :

بانـــــي لك سور طين وقلعـة مبنيه == والثعل لــــو حاص لابد الثعل ينصادي
انت قدمي قد رميت الثوب بالغدريه == قلت ما فصل يا كود الكم ورزقي بادي

البادي :

حالف والله لا احزم البهــــم للجنيه == خابــر سيـــرتك يا حميد ورى حمادي
الخديعــه والخيانـــه ورثكـــم جديه == والحقايق بالمقاضى ميــر خلك هادي



* * *


كتب الزميل ياسر 111 في منتدى دكات عنيزة ما يلي :

(في إحدى الليالي الممطرة من ليالي عنيزة العامرة , أقيم حفل العيد في ( شقيرة ) وهو الآن
مكان موقف النقل الجماعي بعنيزة أمام محلات الناصر للعدد بالقرب من ميدان الساعة ،
حيث كانت تلك الليلة ممطرة فضطر الأهالي إلى إقامة حفلتهم داخل الخيمة المعدة للعيد ,
وكان الشعر ذلك اليوم ليس على المستوى الذي يروق للشاعر/ حمد المغيولي رحمه الله ،
ومن المعروف عنه رحمه الله انه أخذ الشعر فن أكثر منه كوسيلة إعلامية أو دعاية له
كما يفعل كثير من الشعار وللأسف وهم شعار فطاحلة وعلى مستوى الخليج العربي .
فرحمه الله كان إذا وجد الملعب دون المستوى المطلوب تركه وغادر .
في احدى المرات قال له الشاعر المعروف ( خلف بن هذال العتيبي ) لماذا يابودحيم
لاتذهب معنا للعب عند كبار ووجهاء والأمراء فتنتفع أو يأتيك شيء مقابل ذلك ،
فقال رحمه الله انا يا خلف ماني ـ بقرة تعشيها لسانها ـ أي لعب بجد أو بلاش .
وعوداً لتلك الليلة الممطرة كان مجموعة من الحضور يريدون من حمد رحمه الله مغادرة الحفل
وكانوا ينادونه عند باب الخيمة ويؤشرون له بالرحيل ، فالتفت اليهم
الشاعر الكبير / عبدالعزيز البادي رحمه الله ، فكان لايريد من حمد الذهاب معهم
لأجل لايتركه في الحفل لوحده ، فقام ثم وسم بهذه الوسيمة :-


عبدالعزيز :

يـــوم كل تعـــــــذر لا يغنــــــي == قمت اباقف على الرجل الطويله
يــــا سلام الله عليكـم واسمعوني == لا تقـولـــــــــون خلانا وراحي

يـــــا حمـــد جاك رد العلـــم مني == ولع الــزند فوق راس الفتيله
دام عينك تطالــــــع فـــي عيوني == دك غوجك مع الخد السماحي

حمد :

جــــارك الله ياللــــي شـــال عني == ثقلـــة الحمل لا بـــــرز يشيله
يـــا حليل الهـــوا عقب السكوني == جاب الاخبـــار خفاق الجناحي

روّ شنـــك وانـــا رويت شنـــــي == وادفع النضو والطــرقه طويله
جعلها خيـــر والكايــــد يهــــوني == خلها مثل زرقــــات الرماحي

عبدالعزيز :

مـــا بعد طاب كيفـــــي وارجهني == ينهت القلـــب من روح عليله
كان انـــــا قلت زلـــة سامحوني == قلتها بين ضحكات ومـــزاحي

لـــو سبـــور الليالــــــي يخبرني == كان كل يبـــــي يفهـــم حصيله
انت اظنك بعد مــــا شفت لــوني == تحسبنـــي مع الهجمه طياحي

حمد :

حـــن قلـــب الجمل للــولف حني == كل ميـت تحـت لبـن ونصيـــله
ما قصرت الخطا واغضيت عني == تشبع الجايعه صبح الصياحي

كانهــن اسلمنـــك واسلمنـــــــي == سود الايـــــــــام وسط الدبيله
الـــدهر لــو وثقتــــه ما يخوني == انت لك مهجتك والفكر صاحي


نترك للقراء الكرام تحليل ما بداخل الابيات لفهم معنى اللعب والتعليق عليها )