قصيدة ورد .. مع أحمد الناصر

[روح التميمي]

المشاركة الأصلية كتبت بواسطة حمد البادي

هذه قصيده اسندها الشاعر

احمد الناصر الشايع

على الشاعر صالح بن محمد العميم البقمي*

يقول ..احمد الناصر

بالله ياللي تبى الفيحاء عنيزه ديرة اهل الفخر=ياسعد منهم عضوده بالشدايد والزمان العسير
نطٌاحة الكايده لاقلٌ بالدنيا بعير الظهر=الطيب منهم وفيهم كلهم كبيرهم والصغير
جعل السلامه زهابك بالطريق الى نويت السفر=اسلم وسلٌم على عيال العميم اصغيرهم والكبير
اهل الوفاء والمروه والشهامه لو يشين الدهر=من يدك ليدين صالح خذ كتابي جعل خيرك كثير
يابو محمد ليالينا تصافق مثل موج البحر=عجزت اميٌز لها وجه وقفاء يالله مقسوم خير
واحترت مدري وش آخذ وش اخلٌي بين هم وقهر=المبتداء زين مير المقبلات الله علم وش يصير
اللى ذبحني بغير اسلاح ما جاء منه علم وخبر=اللي بعقلي وروحي في حياتي صايرٍ لي خشير
متى علي الله عيوني من صخيف الروح تملى النظر=القلب لولا الضلوع اللي يردنه خطيرٍ يطير
كن الشهر لي سنه عقب التفرق والدقيقه شهر=يالله تلطف بحال المغرم العاشق عليل الضمير
ياصدق راع المثل قال الهوى والحب كله خطر=والزين مثل الحيا متبوع مشهاة الغني والفقير
اتلا الخبر يوم وادعني وقدامه طريق الحفر=للديره اللي ورى الرقعي يقود القلب سلك الحرير
اصعب عليٌ شوفته من شوفة اللي فوق سطح القمر=لاشك ابصبر على ما صا بني لين الفلك يستدير

فرد عليه شاعرنا صالح العميم بهذه القصيده
يقول ابو محمد

بالله ياللي من الزلفي لفيت امكلفٍ بالخبر=من شاعرٍ راية اهل العرف بيدينه ورايه بصير
ريٌح لما تاخذ الواجب علينا يابعيد النظر=ما نذخر اللي يقود الوجه بالعادات ما نستعير
والى نويت السفر برعاية الله دوم دربك خضر=للديرة اللي تحلٌت بالرجال وبالمقام الشهير
ياهل الكرم ماعليكم زود واهل العز واهل الظفر=من عصر الاجداد حتى هالليالي يكملون المسير
من بعد رد السلام إخذ الجواب وردنا مختصر=والله ما تقصر الهقوه وانا في خطوتي مااستخير
قل لاحمد الناصر الشايع زعيم الشعر بدو وحضر=هذا جواب العميم اللي شعيته ياجناب المدير
يابو محمد ليا لينا تصرفها صروف القدر=ما احدٍ مغير حياته من تدابير الحكيم الخبير
عادات الايام يمضي جوها الصافي ويبقى الكدر=ياما علي كلمة الشاعر وديوانه يفوح العبير
لك حق تشكي من الفرقا وقلبك بالهوى ما عذر=ابن سبيل شكى ومحمد القاضي وغيرك كثير
والدار وحده ومثلك بالخليج امقدرٍ معتبر=ان كان وقت الحبايب من مشاوير الزياره قصير
والله يعينك على همٌك وانا همٌي عذاب وسهر=من جادلٍ غض صادفني نقض بالقلب جرحٍ خطير
الزول ما هو غريب وسحره الفتان موتٍ حمر=والمشكل الوقت عيٌن لي عن اعيون الصبايا خفير

* نقلا عن الشاعر حمد البادي