لاتنشغـل فينـي أنا بحالـي ادرى ....!!

[أحبه حيل]

حيـــــاكم الله




لاتنشغـل فينـي أنابحالـي ادرى

""""""""""""""""" قلبٍ تعلق فيك ينسى مـع الوقـت

اكثرمن اللي صارلي ويش يجرى

""""""""""""""""" بين الرجاوالياس فكـري تعلقـت

هاك القصايد لاتضايقـت واقـرى

""""""""""""""""" شف وشكثرفيهالبسماتـك اشتقـت

أثرالوفا ينبـاع عنـدك ويـشـرى

""""""""""""""""" ماكنت اصدق فيك واليوم صدقـت

يامشتهـي فرقا المواليـف حـذرى

""""""""""""""""" تبعدوأنا من سكرة الحـب مافقـت

لاطافت الفرصه تحريت الاخـرى
""""""""""""""""" وتروح ماكنـي عليهـا تشوقـت

ساري لوإن الليـل مافيـه قمـرى

""""""""""""""""" اشيل من حمل الهوى فوق ماطقت

لاصارحظ أقشروالايـام قشـرى

""""""""""""""""" مافيه احد عاقل يلومـك لياضقـت

صحيح بعض الناس فرقاه بشـرى

""""""""""""""""" وبعض البشرلاغاب ليله تضايقـت

ليتك خذيت بليل الاحباب مسـرى

""""""""""""""""" غربت من كثر الطواري وشرقت

السيل يبقاله على القـاع مجـرى

""""""""""""""""" ويبقالـك التذكارلوكنـت فارقـت

اشوف لك من وين مارحت ذكرى

""""""""""""""""" ولاشفتهاصديـت عنهـا ودنقـت

ماكل جرحٍ لاخـذا أيـام يبـرى

""""""""""""""""" بعض الجروح يزيد شره مع الوقت


الشاعر ... متعب التركـــي

[ابوسحر]

كل الشكر عزيزي لنقلك للقصيده

الشاعر متعب التركي كان رمزاً من رموز الشعر

ولكنه اعتزل الشعر مؤخراً بسبب الاحداث الراهنه على حد قوله



كل الشكر لك



محبكم
ابوسحر

[عطاشا]

لاصارحظ أقشروالايـام قشـرى

""""""""""""""""" مافيه احد عاقل يلومـك لياضقـت

صحيح بعض الناس فرقاه بشـرى

""""""""""""""""" وبعض البشرلاغاب ليله تضايقـت

قصيدة في منتهى الروعة والجمال

والشاعر اعتزل شعر الغزل لالتزامه الديني وهو مشرف تربوي بحفر الباطن

شكرا لك اختي على هذا النقل المميز والاختيار الموفق والذائقة الفنية الرائعة

[يزيد]

لفت إنتباهي رد خالي عطاشا !!


الحين اللي يلتزم يترك كل شي حتى الشعر الغزلي ( العفيف ) !!!

والله شي غريب ...

وعشان كذا أقول ان القصيده أقل من عاديه .. وفيها كسور واجد .. مايجبرهن الصمعاني على عزه .

[أحبه حيل]

الشكر لكم ولمروركم اخوانـــــــــي الكرام

وتسلمون

[ريان]

يسلموووووووووووووووووووووووووو

[أحبه حيل]

حياكم الله

وتسلمون على مروركم الجميــــــل

[روح التميمي]

السيل يبقاله على القـاع مجـرى

""""""""""""""""" ويبقالـك التذكارلوكنـت فارقـت
ماكل جرحٍ لاخـذا أيـام يبـرى

""""""""""""""""" بعض الجروح يزيد شره مع الوقت

سبحان الله الشاعر الملهم ملهم , ياناس هذا الشعر , الفكرة عتاب دامي , والمعاني رومنسية تذوب الحديد , والألفاظ عذبة مافيها كلمة صارخة , والأساليب منوعة بين الحكمة والاستفهام المرير والنفي وكشف الواقع المدمر لنوايا المحبوب وحقيقة مشاعره . . هذا اللي يسمونه السهل الممتنع . ويا حسايف والله إن متعب التركي يعتزل . قابلته قبل فترة في ديرته الحفر وأنا ما أعرفه من قبل , وبعد الترف قابلته عقبها بيومين وسألته : ليش ياخوي مالك حضور إعلامي ولا حس ولارس ؟ جاوبني بكلام طويل عريض مختصره إن الإعلام الأدبي مختطف من قبل مجموعة ترز اللي يدفع لنشر إنتاجه حتى لو هوكلام فاضي , وإن الشاعر يحس بالإحباط الشديد إلى مالقى صدى لإنتاجه الجيد بالتشجيع والنقد وهو يشوف إن اللي أقل منه مستوى يتصدرون المنابر الإعلامية . للأسف والله إن متعب التركي قليل اللي يعرفه فلان وفلان ممن يقرضون الشعير لا الشعر تلقى صورهم على أغلفة المجلات أسبوعيا تقريبا . عموما آسف جدا على الاستطراد ولا هوب القصد التفيخر أو يعني إني قابلت متعب أو , بصلاة أمي وأبوي إنه مهوب هذا قصدي , لكن قصدي التحسر على واقعنا الثقافي اللي يدمر الواهب الحقيقية مثل متعب . . عموما الشكر كل الشكر مدبول ثلاثمية مليون ألف لك بتشديد الكاف (واللك باللغة الفارسية يساوي مئة ألف وقيل مليون) لك يا أحبه حيل على هالاختيار الموفق اللي يدل على إن ذائقتك الأدبية أصيلة , وإن مشاعرك مرهفة تميزالفلس من الدينار . تحياتي