الشرماء

[الفتى المفقود]

سلامي على اللي بالخلاء حرك الطاره= سرا والقمر تالي الشهر ما ظهر نوره

مع التلعه اللي كد روى السيل مشجاره= بوسط الحتايف بين الأوعار محصوره

خذ الصيف والكّنه زماليق نواره= وجفت ملازمها وهي قبل ممطوره

بقى عودها اللي لاهب القيظ ما جاره= ثمامٍ ونجم وشيح ونبوت منثورة

على الشاصي اللي ما بعد حل مسماره= جديد الرسوم اللي له أفعال مخبوره

الى هد مع درب الخلاء عمّد غباره= كما الصيرم اللي للهدد قطّع سيوره

ونوره ليا منه لسب ولع بناره= كما برق رعّاد تلاعج من عصوره

سرا يطلب الشرماء على حروة آثاره= معه صحبه بالطيب والخير مذكوره

وحدّر وسنّد ثم عوّد لمحداره= وطاف الشغايا والشغاقيق مخطوره

ظهر للسهل يوم السهل زان مظهاره= وعرّج على قاع صحاصيح ماثوره

تنافج خرانقها على حافة طراره= تقوعي عدنها داخل القاع مبهوره

وحاص الخزز فزع على يمه القاره= سريع الخطا يسري يبي يزبن أوعوره

وحده ورده من يمين ومن يساره= الين اصطفق وسط السهل باخر الدوره

حصرها نطاق النور ما عاد له داره= الين اصبحت بالقاع فزعة ومذعوره

سرا والنجب ملحوم يرمي على الشاره= معه بندق وقت اللزايم لها ثوره

خرط بندقه وأهوى على هقوة عياره= يريد الذهبية واللعبيه يجي دوره

قلبها وعقبها الخزز باول الغاره= وعوّد على باق اللعايب على فوره

وحطه بوسط الخيش ما طال مشواره= وقفا بهونه ما طلع حسن ما طوره

طلع فوق راس الذالق بعالي أدواره= تلقى براد سهيل عن لفح عاشوره

وزهب دلاله عقب ما زان مجماره= بعد نزل العزبة وولع لدافوره

تمرّق وذاق الصيد والربع بجواره= خذا سجة بالعمر والنفس مسروره

الا يا زمان صار بالقلب تذكاره= يبي ينعشن طرياه والحال مستوره

زمان مضى ما حلى سوالفه واخباره= ربيع القلوب اللي لها اعوام مقهوره

اجيبه على الطاروق من غالي اشعاره= وارتب معانيها على واضح الصورة