الشتاء

[الحر المقيد]

وين الشتاء والبرد وذكرى لياليه
وأوقد حطب روحي على اطراف ضوّه
رفّت رموش سهيل ووضحت مواريه
والمرخيات أقفن بقيظ الرهوّه
وين الحبيب اللي يجاوب مناديه
وينعش ضلوع الصدر هبوبٍ مموّه
وأعدّ رعشات بلمسة أياديه
وأنادي اغيومه وتحنان جوّه
وألقى الدفى شوفه واحييه وارضيه
وأحكي حنين القلب لبنت المروّه
هذا وانا ظلماي بصيف المراويه
وخطو السهر يمشي لحتف المنوّه
هارب هروب الشوف عن قصة التيه
لا حول في نفسي وبالله قوّه
أقدار في أسفارجفاف صحاريه
وإذا رأيتِ الشفّ عطشان روّه
يا صافية عينين وصفوى حكاويه
وين الرفيق اللي بنطقه مفوّه
لوه على ذكراه في سهل واديه
ليته ولوّه.. ثم لوّه .ولوّه
هي امنيات الريح غنوة خطاويه
وذيك القوافل في ضميرٍ مشوّه
راحوا ورى رمضاي بحَرّ المشاريه
وشلون أفسر ما بدا لي وأنوّه
خذ ما بقى من قلب وطعون خافيه
وسولف عن الدنيا وما شِئت سوّه
واللي رحل بأبكيه وبوجدي أرثيه
وأدعي له الرحمن بعهد الأخوّه
والحكمة اللي نابته في فيافيه
تحزن على الجدباء وتفرح بنوّه
يا صاحبي لبيه وما جاه يكفيه
قلب الغريب اللي على الهمّ توّه.
يا سارد التاريخ وعثرات ما فيه
ارجع لنور الكون وهَدي النبوّه.