حبي لعيون الريمية

[روح التميمي]

حبي لعيون الريمية=وأهديها روحي هدية
أم الخدود الوردية=والنهد الزامي ذبّاحي
عيونه ياسحر عيونه=يدرون اللي يعرفونه
تاخذ قلبك من ماعونه=ما كنّك ماجود وصاحي
خذتني مسكت ومسانع=ما عندي في شيٍّ مانع
باللي تامرني به قانع=بيدَه قفلي والمفتاحي
راحت بي للشط الأزرق=تمشي جنبي مثل المطرق
قالت در بالك لا تغرق=وأنا بعيونه سبّاحي
بعيونه موجٍ يلعب بي=عذبني وأغدى لي دربي
لكن القلب إلى حَبّي=ما يوحي صوت الصياحي
ما همّي بالديرة غيره=تسوى كل اللي بالديره
الزين الوافي والسيره=وهروجه عِجْبٍ ومزاحي
ياويلي من ضيقة صدري=يوم الرجعة ياللي تدري
الصافي يطلع لي كدري=الرجعة غير المرواحي !
ما يدري غير اللي جرّب=إما شرّق وإلا غرّب
يرجع به ضيقة ومْكرّب=من عقب البال المنساحي
إفراقه ما هوب الهيّن=الجرح الخافي والبيّن
ودّي والأيام يعيّن=ما يومٍ عني تنزاحي
ياربي ترجعني يمه=لين الخاطر يجلا همّه
يازين قلوبٍ ملتمّه=بالحب بْياضٍ وصْحاحي