بسم الله الرحمن الرحيم
البِسّ الطَّيِّب
بالبيتِ امْرَبِّينٍ بِسّ=يَسْرَح يَمْرَح ماله حِسّ
لو يُوذِينا قِلْنا طِسّ=قَلْعَةْ مِداه الحِنْشُولي
لو تَرْفَع له صُوتِك نَزّ=مايفهم من قُولَةْ خِزّ
لكِنِّه ماياكل رِزّ=ولايَرْضَى بالصَّامولي
بِسٍّ طَيِّب مابِه شَكّ=بَاهْلَ الشَّارع مايِحْتَكّ
أَصْلِه مكتوبٍ به صَكّ=ماكولِه كِيكُ اومَعْمولي
إن جا للمِسْتُودَع خَشّ=والى شَافَ السِّفْرِه كَشّ
تَأدِيبِه ماجابِه غِشّ=في رُوما والا نَابولي
راسِه صاحي كِلِّه مُخّ=حِتَّى شعْرِه لُونه جَخّ
بالظَّلْما ماعُمْرِه بَخّ=كِنِّه بَاوْصَافِه كِشْكُولي
عُمْرِه ماخَرَّبْ له شَيّ=ولاجَابَ افْرِيخٍ حَيّ
من صُغْرِه ماياكِل نِيّ=مامُون اوقُرْبِه مَقْبُولي
من نُومَ الصَّاله مامَلّ=لو يَطْلَع بَراَّ مادَلّ
وِالَى اوْحَى له مُوتَر ذَلّ=أَظِنِّه من تِرْثَةْ جُولِي
يَزْعَل لوسَمِّيتِه قِطّ=والى شافَ الفَارِه نَطّ
يَبِي منَ الهاتِف خَطّ=والا مُوبَايِل مَحْمُولي
الطِّفْلِ اِلى شَافِه مَرّ=يَعَرْف انِّه مابِه شَرّ
لو يَسْحَب ذِيلِه ماضَرّ=حِيثِه مَحْفُولٍ مَكْفُولي
أبوزياد
1422هــ
العرض الشجري