قال أبو يزيد : بحثت عن القصائد فوجدتها تعيش حزن
شاعرها الكبير حمد عبدالرحمن المغيولي رحمه الله
فكانت هذه المرثية بفقيد الشعر
جيت القصيد ولا لقيت القصايد = شال الحزن كل المواعيد منها
مابه جماعاتٍ ولابه فرايد = أقفن أو أقفى داعي القيل عنها
أقفن وأشوف الدمع ينزل بدايد = للشاعر اللي في بيانه فتنها
تبكي حمد بدموع مثل الوقايد = تسيل كن الدمع يحرق وجنها
الشاعر اللي حط شعره قلايد = في صدرها في كفها في بدنها
الشاعر اللي وإن بغى اللعب قايد = يقضب زمام الملعبه مع رسنها
هو سيد القيفان للقاف رايد = حلو البيوت اللي براسه وطنها
تبكيه من دم الجروح الجدايد = واللي به جروح قديمه دفنها
ويبكيه من حوله ويبكيه نايد = وتبكي عليه أشعار فكره وزنها
ويبكيه ليلٍ عاف نوم الوسايد = وتبكي نجوم في جبينه حضنها
والموت حق وكل مخلوق بايد = والروح ما تاخذ نفس عن زمنها
في رحمه الله يا حبيب القصايد = ندعي لك بكل الفروض وسننها
وفي جنة الفردوس خير الوعايد= تنزل بها مع كل مسلم سكنها
2007, 02:01 AM
المواضيع المتشابهه
العرض المتطور