صدى(مرثية حمد المغيولي رحمه الله للشاعر "أبويزيد السناني" )

[أبو زياد]

بسم الله الرحمن الرحيم


صدى
(مرثية حمد المغيولي رحمه الله للشاعر عبدالعزيز بن عبدالله السناني "أبويزيد" )

شِعْرَ الوفا من نَبعْ ذيكَ العَقَايد=فكرٍ يغَذِّيها وفِكْرٍ ضُمَنْها
ياشاعرٍ في بَنْدَ الاحْسَاس سايِد=يرسِم مِفاتِن سِرَّها في عَلَنْها
حُرٍّ يِقَيِّد نافِرَاتَ الطَّرايِد=كِنِّه على مَطْلُوب فِكرِه قَرَنْها
منكَ الوفا مضمون يابَالعَوايِد=أمانةٍ غَنِّيت صافي لَحَنْها
جِبْتَ القِصيدِ امْطَرَّزٍ بالفَوايِد=واَحْيِيت ذِكْرَى شاعرٍ مارِكَنْها
أَحْيِيت ذِكْرَى من كَنَز له رِصايِد=بالشِّعر وحْبُوبَ المِشَاعِر طَحَنْها
ذِكْرَى حَمَد مانِيب دُونَه مْحَايِد=لي بالحسين امْعَايِدِه مع حَسَنْها
أُبُو دْحِيم ابْذِكْرَياتِه امْعَايِد=نَنْبِش سواليفَ الرِّضَا من كفِنَهْا
نِسْيَان ذاك الوَجْه بالحيل كَايِد=وَجْهٍ مَلَك حِرِّيِّتِه مارَهَنْها
ساعة فْرَاقِه من عظيمَ الشِّدايِد=خَيَّم على جَوَّ الجِزيرِه دَخَنْها
يابُو يَزيِد امْسَانِد الحق صَايِد=هَذِي مِشَاعِرْنا نَبِي نِمْتِحِنْها
يَسْلَم لِسَانِك عن غَبِيَّ النِّقايِد=عِزَّ القلوب الصَّادِقِه هو ثِمَنْها
مَعْنَاك فوقَ البَهْرِجِه والجَرايِد=ياحَيّ فِكْرَةْ شاعرٍ ماسِجَنْها

عبدالرحمن بن عبدالله الهقاص(أبوزياد)
عنيزة 28/8/1428هـ

[روح التميمي]

الله يعطيك العافية يابو زياد

قصيدة جزلة جزالة شاعرية أبوزياد

رحم الله حمد المغيولي , وشكرا لك ولأبي يزيد

شاعرنا العذب عبدالعزيز السناني

والوفا منكم للمرحوم محل اعتزازنا جميعا

ومهوب كثير على المرحوم , ولا مستغرب منكم

تقبل تحياتي

[ياسر التميمي]

صح لسانك كفيت ووفيت والله يرحم ابو دحيم رحمة واسعه