سلام ياراعي الموتر العودي

[حمد البادي]

سـلام ياراعـي الموتـر العـودي=الله يسعـد ليـا ليـك وايـامـك
لا واهنـي سايقـك بالهنـا كلـه=لو كان درويش ما يفـرق الزينـي
لولاي أداري من النـاس منقـودي=لا حـكٌ رفرفـك وادقٌ صـدّامـك
واعرقل السير مانـي مـراعٍ لـه=واضرب بعرض الجدار القوانينـي
من شان اطالعك في داخل البـودي=اموت واشـوف برقعـك ولثامـك
يازايد القلـب علـه علـى علـه=يامـورد الخـد ياكاحـل العينـي
ذالي زمانيـن حـاوي ومـردودي=حتـى تحلّيـت لبسـك وهندامـك
ياجنتل الـذوق يـا باهـي الطلـه=مليت شـوف الغنـم والبعارينـي
اسـال رب السمـاوات معبـودي=يجعل لك الستـر خلفـك وقدامـك
واهني بالوقت من هو حليـل لـه=عـز الله إنـه غنـي الغنيّيـنـي
يشوف بالعيـن ويثنـي العـودي=ويشم ريـح النواويـر بأنسامـك
مانيـب حاسـده والله يمهّـل لـه=واللـي عطـاه يتكـرم ويعطينـي
مدري متى يستوي بك علي الجودي=ياقلب مركـب مناويـك واحلامـك
عذبتنـي كـل بـرقٍ تخايـل لـه=والقطر محبوس والناس مسنينـي
يكفيك مافات فالبيـض والسـودي=لا الهند هندك ولا الشام هو شامك
خلك بنجدك علـي صالـي الملـه=يشويك حـره وبـرده ويشوينـي
الورع للـورع والعـود للعـودي=كـل بلامـه وخلـك علـى لامـك
شمسك بروس الذوايـب ومنتلّـه=وش باقيٍ بعـد كملـت خمسينـي
شيبت والنقص بادٍ علـى الـزودي=وانـا اتحـرى مَحَنّتْـك وريامـك
خلك علي الدين خلك علـي الملـه=لا تحفي الرجـل خلـف المقفيني

[ابو سراج]

صح السانك
ابو عبدالعزيز
والله اني من محبي شعرك
والله اني ادعي ربي انه يرزقني زي موهبتك
والله ايوفقك

[إنسان جريح]

ياليت اللون ما هوب عودي



رائعة مثل كاتبها

[حمد البادي]

هلابك : ابو سراج

الغالي

حبك مولاك يابعدي

ولا عليك زود

هذا بس من ذوقك ياذوق

[حمد البادي]

نورت يا : انسان جريح

سلامتك من الجرح

نغير اللون ، لعيونك

يالغاااااااااااااااااالي

وش تبيه بس ؟

الرائع انت بمرورك الكريم ومداخلتك الجميله

لا عدمتك