الشتاء

[الحر المقيد]

وين الشتاء والبرد وذكرى لياليه
وأوقد ضلوع الوجد على أطراف ضوّه
وأعدّ رعشاتي بلمسة أياديه
وأنادي غيومه وتحنان جوّه
وألقى الدفى فيني وأداريه وأخفيه
وأحكي حنين الدار وأهل المروّه
واسهر على أجفاني عن الغيّ والتيه
وأنا معك بالحلم وعطشان روّه
يا صافي العينين ولو فيه ما فيه
وين الرفيق اللي بنطقه مفوّه
لوه على ذكراه في سهل واديه
ليته ولوه.. ثم لوه .ولوه
هي امنيات الريح غنوة خطاويه
وذيك القوافل في ضميرٍ مشوّه
راحت بنا الأيام وعادت بلا ليه
وشلون أفسر ما بدا لي وأنوّه
نامي ترى ظلماي بصيف المراويه
دام السهر يمشي لحتف المنوّه
خذ ما تبي وارتاح بعذبه وصافيه
وسولف عن الدنيا وما شِئت سوّه
واللي رحل بأبكيه وبوجدي أرثيه
وأدعي له الرحمن بعهد الأخوّه
والحكمة اللي نابته في فيافيه
تحزن على الجدباء وتفرح بنوّه
يا صاحبي لبيه وما جاه يكفيه
قلب الغريب اللي على الهمّ توّه.