ليتك تشوف الحال

[بواقي جرح]

ليتك تشوف الحال يا زين وتروف
نفسي من الفرقا تزايد خطرها

لك ود في روحي ولو حالت ظروف
ليتك تصونه دام حبك أسرها

ماترحم اللي بعد فرقاك مصدوف
دمعه على خده من أجلك نثرها

كم ليلةٍ مرت وأنا القلب ملهوف
كم ليلةٍ مرت أسامر قمرها

اسهر طوال الليل والهم بالجوف
يحرق بنفسي صبرها من قهرها

مني عيوني تشكي الهجر بحروف
متى تبي تطفي لهايب سهرها

عينٍ جزت عن لذة النوم من خوف
ما يرجع اللي فيه يكمل نظرها